Maanhadal
Wareysi Bare Sare Carraale: Waa kuma Aabbaha Miisaanka Maansada Soomaaliyeed?
By WardheerNews
Oct 25, 2008

Gaarriye isaga uun baa meelahaa ka yidhaahda, qaar baa waxaygii igu haysta. Maansada iyo miisaankeedaba in uu isagu leeyahay ha caddaysto. Sida dukaamadaa is xiga, midba wax gooni ah u iibiyo ayaa miisaankana qofba dhinac ka geli  karaa. Yaa ugu horreeyey ee miisaanka daah-furay marka ay noqotana waa hubaal in uu Carraale yahay, maragna weliba aan soo tubi karo. Intoodaba anaa u horseed ah. Haddii uu wax cajaa’ib ah"surprise" hayana, waxa aan hayaa mucjiso "miracle." 
                                                                              
Bare Sare Carraale

Ka dib markii ay dhawaan WardheerNews soo daabacday wareysi khaas ah oo ay la yeelatay Abwaan Maxamed Xaashi Dhamac(Gaarriye), uuna ku soo bandhigay aragtidiisa arrinta muranka daahfuridda Miisaanka Maansada Soomaaliyeed ee isaga iyo Bare Sare Cabdilaahi Diiriye Guuleed(Carraale) ka dhex aloosan, ayuu Prof. Carraale la soo xidhiidhay WardheerNews si uu wax uga yidhaahdo arrimihii uu Abwaan Gaarriye ku sheegay Wareysigiisa.

Haddaba WardheerNews iyadoo ka faa’idaysanaysa fursaddaas qaaliga ah ayaa waxaa u suurto gashay in ay mar labaad aqoonyahanka ka wareysato arrinta muranka cidda daahfurtay miisaanka maansada Soomaaliyeed iyo fikirkiisa ku aaddan waxyaabihii uu Abwaan Gaarriye kaga hadlay wareysigiisa.

Bare Sare  Cabdillaahi Diiriye Guuleed (Carraale) waxa uu wareysigan si aad ah ugu faahfaahiyay waxyaabaha caddaynaya in uu isagu yahay aqoonyahankii ugu horeeyay ee daahfuray Missaanka Maansada Soomaaliyeed.

Prof. Carraale ayaa arrintan inta badan u cuskanaya  buugggiisa Gorfaynta gabayga oo uu sheegay in uu dhammaystiray sannadkii 1975kii.

“Kolkii aan miisaanka gabayga helay, Bare Cumar X. Aadan Cilmi tixda boogaadinta ah(forward) ee ku taariikhaysan 1975kii ayuu ii tiriyey, ka dib markii aan dhammeeyey "Gorfaynta Gabayga." Isaga oo igu tilmaamaya in sida naakhuuduhu doonta u hoggaamiyo anna aan maansada u hago. Illayn beenaale markhaatigiisuu fogeeyaa bay Soomaalidu ku maahmaahdaaye, eega bogga 47 ee “Gorfaynta Gabayga”: ayuu yidhi Bare Sare Carraale.

Waxaa kaloo uu wareysigan ku xusay aqoonyahanku in qoraalada ay ka tageen Prof. Andrejewiski iyo Alle naxariistiisa janno ha siiyee Muuse Galaal aanay si gaar ah ugu magacaabin Abwaan Gaarriye, hase yeeshee ay meelo badan ku xuseen kaalintiisa Carraale ahaan.

Prof. Carraale waxaa kaloo uu wareysigan kaga hadlay doodda abwaan Gaarriye ee ah waxa uu Carraale jawaab uga bixn waayay amaba uga hadli waayay xilligii uu qoraaladiisa ku soo bandhigayay wargeyskii Xiddigta. Prof. Carraale waxa uu isna ku doodday in hawshiisii Gorfaynta gabaygu ay horeysay ee muxuu Abwaan Gaarriye uga hadli waayay.

Haddaba Bare Sare Cabdillaahi Diiriye Guuleed (Carraale) oo arrimahaas iyo kuwo kale oo badan kaga  hadlaya wareysigan ayaa waxa uu u dhacay sidan:

WardheerNews: Bare Sare Carraale waad ku mahadsantahay fursadda aad WardheerNews mar labaad u siisay in ay wareysi kula yeelato. Wareysigan waxaan ku salayn doonaa weydiimo raadraacaya wareysigii Abwaan Maxamed Xaashi Dhamac (Gaarriye ) aanu dhawaan la yeelanay.

Carraale: Idinkaa mudan

WDN: Bare Sare Carraale, Miisaanka Maansada Soomaaliyeed qofkii hor helay sugitaankeedu dood dheer ayuu dhaliyey. Maxaad ku qancin kartaa qofka, isagu u janjeera xagga abwaan Gaarriye,  doodna ka keena inaad adigu tahay aqoonyahankii ugu horreeyay ee daahfuray, soona bandhigay Miisanka Maansada?

Carraale: Waxa aan ku qancinayaa:
Kow, in ay qoraaladayada dhugtaan, una fiirsadaan mucda ay kala xanbaarsan yihiin labada hawlood. Laba, in ay u dhabbo-galaan amminta hawlahan. Saddex, in kolkii aan miisaanka gabayga helay, Bare Cumar X. Aadan Cilmi tixda boogaadinta ah(forward) ee ku taariikhaysan 1975kii  ii tiriyey, ka dib markii aan dhammeeyey "Gorfaynta Gabayga." Isaga oo igu tilmaamaya in sida naakhuuduhu doonta u hoggaamiyo anna aan maansada u hago. Illayn beenaale markhaatigiisuu fogeeyaa bay Soomaalidu ku maahmaahdaaye, eega bogga 47 ee “Gorfaynta Gabayga”:

                            Naakhuude doonidu nin raga,             way u nugusheeye
                            .........................................,             ...........................
                            Maansaduna yay noqon mid aan,      cidi naruuranin.

Marka 1975
 


                                                                                                                     
  Taariikhdaa ah “Marka 1975” ee bogga 47 ee gabayga Bare Cumar ayaa marag fureysa in hawsha buuggani ka  horreysay xilliga Gaarriye ku dhegan yahay ee ah “January 17, 1976” ee uu maqaalada Xiddigta Oktoobar ku bilaabay. Gaarriye kii u dambeeyey maqaaladaa wuxuu qoray “29/05/1976”, anniga kuwaygu shan bilood ma socon ee hal mar ayaa lagu wada daabacay buuggii “Gorfaynta Gabayga”. Gaarriye qoraaladiisa Xiddigta, isagoo aan meel ku hubsan oon gebagebeyn ayuu hal mar joojiyey, anniga waxaan ku gebagebeeyey xilligaa:

 


“FIIRO GAAR AHAANEED”
Heerkii saddexaad (Hormaynta Alammada) waxa uu ku jiraa qaybta labaad ee hawshan(Miisaanka Maansada)."

 


Arrag bogga 51 ee “Gorfaynta Gabayga”. Labada qoraal ee buuggayga “Gofaynta Gabayga” iyo maqaalada Xiddigta Oktoobar ee Gaarriye waa la kala garan karaa siday u kala nidaamsan yihiin oo u soo kala hor mareen.

WDN: Abwaan Gaarriye wareysigii aan la yeelanay wuxuu isbarbardhigay qoraalkiisa Janaweri 1976 iyo kaagii 1978 ee Xiddiga Oktoobar ku soo wada baxay. Maadaama uu isagu Xiddigta Oktoobar ku soo hor daabacay wuxu taa caddayn iyo marag uga dhigtay inuu yahay ruuxii u horeeyey oo qoraal ku soo bandhiga Miisaanka Maansada. Waxaa jirtay in aad  dhawaan WardheerNews u soo gudbisay buuggaagii "Gorfaynta Gabayga" ee la daabacay 1976. Ma jiraan wax muujinaya taariikhda buugga iyo hawshiisu iney ka horeysay 1976? Faahfaahin dheeraada ma ka bixi kirtaa hannaanka buugga lagu daabacay iyo hawshii gashay?

Carraale: Haa, way jiraan wax caddaynaya in qoraalkaygu horreeyey.
Kow, waa tixda aan kor ku xusay ee Bare Cumar ugu deeqay "Gorfaynta Gabayga" ee taariikhda  “Marka 1975” sugaysa.  Laba, inta buug dhan oo dhadhan iyo dhumuc kala qeexan leh lagu qori karo iyo inta maqaalo shan bilood socday jariidad lagu qoray waa marag.  Saddex, hannaanka lagu daabacay dhib badan buu lahaa, waayo xilligaa sida loo helo "type-writer" ama qof kaa taageeri kara hawl badan iyo muddo isla baadi-doon bay qaadan jirtey, mana fududayn si laysula helaa. Afar, hawshii gashay "Gorfaynta Gabayga" maskax, maal, muruq iyo muddo ay qaadatayba way isugu jirtey.
 
WDN: Waxaa jirtay in aad  dhowr  qof oo aad ku tilmaantay in ay hawshaada ka war hayeen  aad wareysigii hore ku magcawday. Ma jiraan ilaa iyo hadda dadkaa la socday hawshaada wax ka faallooday Miisaanka Maansada oo kuu marag furay? Markhaatiyada abwaan Gaarriye magcaabay, Andrzejewski, Muuse Galaal iyo Saalax Jaamac maxaad ka odhanaysaa?

Carraale: Haa, maragga aan cuskaday qaar ka mid ihi way qireen in aan anigu ugu horreeyey qof hela sirta maansadu ku salaysan tahay. Waxay qirayaan oo kale in aan ahay qofkii u horreeyey oo qoraal buug dhamaystiran ka kooban ku soo bandhiga miisaanka maansada. Waxa ugu horreysa Fadumo Axmed Caalim (Fadumo-ureji), oo xilligaa ahayd guddoomiye-ku-xigeenka qaybta dhaqaalaha Jaamacadda Ummadda Soomaaliyeed (JUS). Fadumo-ureji ayaa u xil-saarrayd guddi u xulka iyo qiimaynta qoraalada/buuggaagta JUS iibsaneyso. Maraggii ay ii furtay oo codkeedii ah waxaa laga maqli karaa mareegaha/ websites-ka Soomaaliyeed badankooda. Waa madax meel ka sarraysa oo la taabtaa ma jirto. Waxa weheliya kuwo kale oo waraysigii hore aanan magacaabin, illayn hadalka waan gaabinayaye. Iyana inta ay soo mudh-baxeen ayay ii marag-fureen. Qoraaladoodii mareegaha iyana way ku jiraan iyo qaar kaloo badan oo jidka ku soo jira.
 
Ta kale, Dr. Goosh iyo M. X. I. Galaal (Alle ha u naxariistee) dhiirri-gelintoodu marag ma noqon kartaa? Qoraallada ay ka tageense wax isaga gaar ahaan hawsha ugu magacaabani ma ku jiraan?  Waxa cad in Dr. Goosh hadduu Gaarriye la ogaa inuu yahay qofka miisaanka helay uu ku tilmaami lahaa qoraaladiisa. Dr. B. W. Andrzejewski(Goosh) qoraalkiisii “INFILLS: NOUNS AND VERBS WITHOUT LEXICAL MEANINGS IN SOMALI ORAL POETRY” ee ku soo baxay African Languages and Cultures, Vol. 1, No1. (1988), pp.1-14 wuxuu si cad u qorayaa:

 


"The demanding rules of alliteration are combined with those of quantitative scansion, which has a variety of metres allocated to  each poetic genre (11). In each metre there is a fixed  number of morae, i.e. time units of syllabic length, with a short syllable counting as one mora and a long one as two".

Dr. Andrzejewksi wuxu akhristaha u tilmaamayaa qoraalkaygii 1980[(11)-Detailed accounts of the Somali system of scansion can be found in Abdillahi Deria Guled (1980)… ].

Magcaabid la’aantaasi waa marag in Gaarriye sheegashadiisa ah Andrzejewksi ayaa i ogaa meesha ka ka baxayso. Andrzejewksi aniguu ii marag furayaa oo qoraaladayda xusayaa. Dr Andrzejewski meel uu Gaarriye keli ugu magacabay ma la hayaa? "In other words, Dr Goosh attributed the prevailing work to  Guled and attenuated or rather discarded Gaarriye's present claims."

Fadlan akhriya "SOMALIA IN WORD AND IMAGE"  oo Carraale keli ah loogu qiray hawshan.  Waxa kale oo aad akhridaan: African Languages´and Cultures 10, 1 (1997): 83-100 AN APPROACH TO RELATIONSHIPS BETWEEN SOMALI METRE TYPES, by Martin Orwin and Maxamed Abdullaahi Riiraash oo leh: "The study of Somali metrics was revolutionized in the md-1970s with the publication, in the Somali national newspaper Xiddigta Oktoobar, October Star, of a number of seminal articles by the two Somali scholars and poets Maxamed Xaashi Dhamac 'Gaarriye' (referred to in this article as Gaarriye, except for bibliographical reference) and Cabdillaahi Diiriye Guuleed , who made the long-awaited breakthrough in Somali metrical studies, apparently independently."

Dadkii uu lahaa anaa u sharrixi jirey, miyay wada god-galeen? Saddexdii  "lot" ama class ee Lafole xilligaa ku wada jirey, anigu qaar magacaabaye, muxuu isna qaar u sheegan la'yahay?
 
WDN: Barre Sare Carraale, maadaama kani yahay wareysigii labaad ee arrinta la xidhiidhay oo Gaarriye isna mid bixiyey. Hannaan iyo hab noocee ah ayaad rabtaa in adiga iyo Abwaan Gaarriye arrintiina lagu kala saaro? Sida Gaarriye sheegay ma kula tahay in warbaahinta arrintan oo kale door uga bannaan yahay?

Carraale: Ugu horrayn, waa in la is weyddiiyaa: b. yaa is haya?  t.  maxaa la isku hayaa?     j.  yaa  arrinka la isku hayo ka gar-soori kara?
Waxa uu afkiisa ka qiray in labadayada hawlood kala duwan yihiin. Haddaba aniga marnaba la igama maqal in aan  Riiraash, Johnson iyo isaga midnaba haysto e, ha sheego waxa uu igu haysto. Intayaduba miisaankaan wax ka qornay.


Isaga uun baa meelahaa ka yidhaahda, qaar baa waxaygii igu haysta. Maansada iyo miisaankeedaba in uu isagu leeyahay ha caddaysto. Sida dukaamadaa is xiga, midba wax gooni ah u iibiyo ayaa miisaankana qofba dhinac ka geli karaa. Yaa ugu horreeyey ee miisaanka daah-furay marka ay noqotana waa hubaal in uu Carraale yahay, maragna weliba aan soo tubi karo. Intoodaba anaa u horseed ah. Haddii uu wax cajaa’ib ah"surprise" hayana, waxa aan hayaa mucjiso "miracle." 
Qof waliba waxa uu bulshada ku soo kordhiyey ha u soo ban-dhigo, dadka ayaa kala doorashada lehe, yaan dadka maskaxda laga caayin(insulting intelligence) oo qofna ku naaloonin in ummad la wada khiyaamayn karo.
 
Haddii aan u imaaddo, weyddiinta ah yaa ka gar-niqi kara, sida aan qodobada, b, t,  iyo j ku xusay kol haddii arrinku shaad iyo koodh kala yihiin, illayn waa laba feedho-gale maxaa muranba keenay? Haddii laga tagi waayana, ma jaamacadda ayaa shahaadadda aqoonsi bixisa mise jariidad? Aniga oo aan weriyeyaasha iyo mareegahatoona wax u dhimayn, waxa aan qabaa hawshan in ay iska leeyihiin jaamacadaha qaybta suugaantu. Waa dadka ku foogan ("literature and literary ciritiques"). Afkeena waa maanso-dhaadhi. Waxa meesha yaalla, haddiiba la isku haysto ma  aha gabay, gabayaa ama maanso ee waa gabayaanimo("i.e not a poem, poet or poetry per se, but it's rather a  matter of poetics.") Haddaba gabayaanimadu waa hab-dhismeedka bahaha maansada oo dhan e, yaa hawshaa barasho gaar ahaaneed u leh? 
 
WDN: Maxaad ka odhanaysaa dooda Abwaan Gaarriye oo ah inaadan wax jawaab ah ka bixin qoraaladiisii Xiddigta Oktoobar ee 1976. Ma jiraan meel aad ku soo bandhigtay miisaanka maansada xilliyadaa  oo aan ahayn Xiddigta Oktoobar? Gaarriye sidee arrimahaa u arkayey xilligaa?

Carraale: Waxa aan doodaa ka leeyahay, hawshaydaa horreysaye(Gorfaynta Gabayga), muxuu isagu wax uga odhan waayey? Markii aan 1978 Xiddígta Oktoobar Khamiis walba maqaallada aad aragteen ku soo qori jirey, isna maqaallo aan miisaankaba la xidhiidhin buu marmar isla maalintaa ku qori jiray. Annigu, sidaan hore u sheegay, xilligaa uu Xiddigta wax ku soo qori jirey magaalada Marka ayaan joogey, macallinna ka ahaa. Kolka isagu xilliga aan anigu wax ku soo qorayey isla Xiddigta waxa aanu wada joogney Xamar. Doodda uu ammintan soo aloogayo, maxaa berigaa ka hor-joogey?

Ta labaad, kolkii ay gole-ka-fuulka ahayd ee 1979 & 1980 qofkii cilmi-baadhis sameeyey ku soo ban-dhigay Hotel Jubba &  Curuuba wuu fadhiyey, dhegeyste ayuuna ahaaye, muxuu wax ula soo bixi waayey ama Carraale oo labada shirba waraaqo ka akhriyey wax uga odhan waayey?  Fadlan eega:
"SOMALIA and the WORLD:Proceedings of the International Symposium, held in Mogadishu, October 15-21, 1979 Compiled and Edited by Dr. Hussein M. Adam," p. 132 "The Scansion of Somali Poetry, by: A. D. Guled of the Somali National University. Also cite those who said, "Their papers are not yet complete," which was a lame excuse and lack of authentic credentials.
 
WDN: Bare Sare Carraale, nooga waran sida  uu u badbaaday buuga "Gorfeynta Gabayga" maadaama hal nuskhad oo keliyii jirtay oo aan la badin? Ma jiraan cid aad halkan uga mahad celinayso oo dhawray buugaa?

Carraale: "Gorfaynta Gabayga" oo xabbad qudh ihi ifkaba u soo baxday, waxa ay gacantayda ka baxday kolkii Jaamacadda Ummada Soomaaliyeed  iga iibsatey.
"Gorfaynta Gabayga" oo xabbad qudh ihi, waxase ay mar labaad igu soo noqotay 10.10.08 oo Deeq Diiriye, oo aan mahad aan la koobin karo u celinayo, dib iigu soo diray. Waxa arrinkaa sabab u noqday Siciid M. M. Shire oo isaga oo muddo la socdey, ogaana in midhkii kelida ahaa ee adduunka jirey uu hayo Deeq Diiriye. Deeq Diiriye oo muddo dheer xannaaneeyey iyo Siciid oo isna raacdo iyo xidhiidh dheer ka dib ii soo sheegay halka uu ku sugan yahay qoraalkii xilliga 32 sannadood ku siman iga maqnaa abaalkooda maba gudi karo. Mahad-naq af laga sheego arrinku waa ka badan yahay, waayo waax iga maqnayd bay ii kaabeen. Labaduba xil-gudashada aqoon daryeel ay mudan yihiin, anna mahad ballaadhan oo xusuus reebto ah bay iga kasbadeen. Mid walba waxa aan ku odhanayaa: "Igu lihid."

WDN: Aad baad u mahadsantahay Bare Sare Cabdillaahi Diiriye Guuleed (Carraale)

Carraale: Idinkaa mudan
WardheerNews


We welcome the submission of all articles for possible publication on MaanHadal.com .
please email your article to Webmaster@Maanhadal.com
Opinions expressed in this article are those of the author and do not necessarily reflect the views of MaanHdadal.com